Franco Gambarelli
La turta de casal
2018-06-30 17:38:02
A grànde richièsta ripéti la ricèta d’la tùrta de Casàl ch’ ò püblicàd in Agùst del d mìlatri (quànti àni i èn pasàdi!!!) perché in divèrsi i m’àn fermàd per la stràda per dim da scrìvla amò perché l’àn pèrsa. Ècco tàme se fà la nòsta tùrta; l’è ‘na specialità ’nsì bùna che gh’i da pruàla. ‘Péna i casalìn i püdèvun pensà da fà ‘na tùrta sens’öu. Impastè mes chìlo de farìna, dü èti e mes de bütèr deslenguàd, un éto e vinticìnch de sücor (me racumàndi gnént öu, fè no i sganìsi!). Per el pién fè tustà d’la früta (pìri, pèrsogh, brügn) sügàda cun amaréti sbrisulàdi o preparè di rumàndul tridàdi e bagnàdi cul ‘chèrmos. Cun metà d’la pàsta quatè el fund d’na téia vunsüda de bütér e spulvràda de pan gratàd. Metè el pién bèl sparpaiàd, fè di bissulòti per el bord e, sùra, ricamèla tàme v’pias (cìrculi d’bicér, stèle, grapéi d’üga). Fèla cös nel furn a cetnuànta gràdi per quarantacìnch minüti e… sentarì che udurìn! Ve sperlecarì i barbìsi quand la mangiarì! Son prò sicüra che la tùrta che farì la sarà mài bùna tàme quèla che püdì tastà a Casàl perché l’è l’ària (sénsa inceneridùr!!!) del nost paìs ch’ la ghe dà un saùr spetaculùs. Comùnque el segrét l’è: òli d’gùmod per impastà e pö tànte carése a la pàsta ch’la gh’à da diventà ‘na bàla mòrbidà, tévda, lüstra, bèla da véd e bùna da mangià ànca da crüda. La tùrta de Casàl l’è la püssè bùna del mund perché la gh’à bisògn de fòrsa e gàrb: se le ròbe i èn fài cun amùr i végnun bén; le ròbe fài per disprési i èn brüte e gràme. Sìu d’acòrdi? Ve spetém a mangiànu ‘na féta la dumìnica d’la sàgra, si tüti invitàdi. Adès che v’ò dulsìd ‘ndarò a pruéd, veramént adés se dis “a fare shopping” . Ve ricurdì tàme fèvom una vòlta? Ciapèvom la spòrta e ‘ndèvom ni butégh ch’i èrun tüti sü la cuntràda visìn a ca. A la matìna bunùra da Marietìna, la latèra, cun la pignatìna a tö el lat ch’ la travasa dai bidòn d’alumìnio. Pö da Basàn ch’èl fà ‘ndà la pusterìa. ‘Ntant che spèti el me tùrno da es servìda, ciciàri: “Buon giorno, Pierina, stàla bén? E a lé, sciùra Tugnèta, gh’è pasàda la sciàtica? Ciàu, Nucénta, quand el to om el va a pescà digh da purtàm un po’ de bot e d’sédul da fa rustì.” Tùca mi e tödi dü èti d’sücor, més èto de bütér, un èto d’salsìsa, un èto de nùmbul de nimàl, més chìlo de farìna giàlda insì fò ‘na bèla pulénta cun la pùcia da sperlecàs i barbìsi. Bàsta insì. Basàn el tìra su da l’urégia la matìta e in un àtim, a man, el fa el cünt ch’el màrca sül mè librét e sül so regìstor. Pàghi una vòlta al més, al vintisèt, quànd ciapém el stipéndi. “A rivédos dumàn”.Vò da Pìnu Mèrlu, el frutaröl. Che persunàg! Sémpor malmustùŝ, ma el gh’à la verdüra frésca. “Buon giorno, Pinu. El me dàga: cinq patàti, dü tumatési, un masét d’erburìn, ‘na brànca d’pisèli per mét n’la pùcia insì la crés e dü pùmi”. Gh’ò amò da tö el pan, vo da Cipriàno, el prestinè. Lü el fa el pan de not, la so dòna la servìs del dì. Tödi més chìlo de s-cepìn. Quàsi me deŝmenteghèvi da pasà dal savatìn a ritirà i scarp del me om ch’ò fài sulà. Ècco i èn tàme növi, insì i dürun amò un an. Tùca sta ‘tènti a spénd, tùca tégn da cünt. D’ sòldi gh’n’è pòchi e s’fà fadìga a tirà la fin del més. Adès l’è tüta ‘n’àltra sùlfa: ‘ndém a tö tüt al supermercàto. Bàsta no ‘na spòrta, se gh’vör dés sachéti per svudià el carél culm d’ògni bèn de Dìu. Fò pü marcà, pàghi cun la càrta di credito, l’è còmuda, ma quàsì me ‘còrgi no ch’i danè i vùlun. Ògni témp el gh’à le so mòde ànca per ‘ndà a pruéd, ma sémpor in ùna famìglia tùca rigirà bén el stipéndi per vìu cun unùr. Sìu d’acòrdi?
Franco Gambarelli
Sagra a Casalpusterlengo
2018-06-30 17:35:19
Descrizione: La descrizione per “Festa di San Bartolomeo” (Festa patronale) non è ancora completa. Festa di San Bartolomeo è uno degli eventi lombardi in programma nel comune di Casalpusterlengo (LO), . In alternativa puoi consultare l'elenco degli argomenti dello stesso tipo - feste popolari, sagre e altri eventi enogastronomici - presenti nel territorio regionale o nei comuni vicini a Casalpusterlengo: Attenzione: la pagina “Festa di San Bartolomeo” potrebbe fare riferimento ad un evento passato, verificate tramite eventuali contatti la data e l'effettiva realizzazione dell'evento. Se avete novità segnalatele alla redazione.
Franco Gambarelli
Feste Varie a Cremona
2018-06-29 04:05:56