Verona: tradizioni, dialetto e non solo
Poesie in dialetto veronese sul tempo d'inverno
Oggi desidero dedicare a tutti voi quattro poesie in dialetto veronese scritte da Berto Barbarani che parlano del tempo d’inverno: della pioggia, del vento, della nebbia e della neve. Buona lettura 😊
Oggi desidero dedicarvi quattro poesie in dialetto veronese scritte da Berto Barbarani, poeta italiano e massimo cantore del dialetto veronese (Verona, 1872-1945).
Più precisamente si tratta di 4 sonetti che fanno parte della raccolta “Tempo in moto” che parlano rispettivamente della pioggia, del vento, della nebbia e della neve. Ecco a voi i sonetti:
LA PIOVA
Quela matina, che Dio fa la piova,
me sento cocolar da 'na caressa...
L'è un augurio vissin de bona nova,
che me mete in amor de gentilessa;
e con più che me par, che la se mova
chieta, chietina, come l'oio, e spessa,
mi no ve posso dir cossa che prova,
ma l'è come piovesse contentessa!
Gh'è ci se gode a strologar le stele
o la luna in t'el posso, el sol che brusa,
e mi invesse no studio, che le ombrele;
parchè penso, che i òmeni, sti mati,
i se ghe sconda soto co la scusa,
che el Signor no ghe lesa i so pecati!
EL VENTO
Altro compare, che me vol contento
e con più che el barufa più el me piase,
quando co i veri el fa tremar le case,
se lo volì saver, l'è propio el vento...!
Far malani, l'è el so divertimento:
se dorme un fogo, el supia su le brase,
el ghe rompe le ore anca a le rase
e i àlbari se piega al so tormento...
Nei camposanti el te spaventa i ciari,
ne le ciesete el sona da romita
e el pascola le vele intorno ai mari....
In politica, el va par la più drita,
che sventolando pulpiti e sipari,
el fis-cia le comedie de la vita...!
LA NEBIA
La nebia, fioi, l'è quela çénar grisa,
che la par tamisada in çimitero...
Quando che l'aria ciapa udor de fero
e la se mete intorno sta camisa,
tuto de colpo l'ocio se spoëtisa,
par mi no so qual magico mistero:
parlo con Toni e me risponde Piero...
Baso Nineta e l'è la vecia Lisa...!
Messa in màscara e in balo sta gasèra,
la vita te deventa un carneval
dove tuti la fa a la so maniera...
Te ciami, par esempio, un vetural
parchè el te porta a finir ben la sera
e quelo te compagna a l'ospedal!
LA NEVE
Zà, che a 'na çerta età i ossi i ne cioca
e s'è moli de suste e de çervel,
penso a la bela neve da putel,
che se cantava: Lassa pur che fioca...!
E sù puoti co la pipa in boca,
e zò bale al bersalio in t'el capel....
Adesso, che me nevega sul pel
me toca brontolar: Dio come fioca!
E da po', che la Moda un fià veciota,
ne g'à piantado su la testa, greve,
tanto de cana e la pipeta in boca,
cosa ne resta de sta vita oca?
Semo tornadi al òmeni de neve,
pronti a cascàr co l'ultima balota!