La ricèta dei gnòchi a Verona

Come se cusinà i gnòchi a Verona?

Ricèta dei gnòchi de patata

Cosa ghe vol:

• 1 chilo de patate a pasta farinosa
• 3 eti de farina
• 1 ovo intiero
• sal

Come far:

Dopo aver lavà ben le patate, bisogna cósarle in aqua,

con un pirón verificar la perfeta cotura e dopo se cava via la scorsa.

Le se passa al tamiso e le se impasta con la farina, ovo e sal; laorar ben l'impasto fin che'l deventa sofice; convien butàr un poca de farina su la tòla de laorassion parchè se no se riscia che la pasta la se taca.

Ora, formar dei bìgoli de pasta alti un deolón, se i taja longhi tri schei, e con un veloce movimento dela man se i fa rugolar su la gratacasóla, dal'alto in basso strucando un poco. Quest'ultima laorassion serve a far tacar mejo el sugo al gnoco.

Versar i gnochi in una pignata con l'aqua che bóie e se i pesca con un scolin 'pena i vien de sora.

Consàr a piaser co’: botiér desfà e formàio parmigian, sugo de pomodoro e formàio parmigian, gorgonsola desfà, pastissada de caval par i veronesi d.o.c., pastissada de musso par i sanzenàti d.o.c., sùcaro e canèla ne la bassa veronese al confin co' Padòa.

Ricèta dei gnòchi sbatùi de malga

Cosa ghe vol:

• 600 grami de farina
• 20 grami de sàl
• 1 litro de late
• 1 cuciarìn de lievito

Come far:

In una terina, métar la farina a fontana e zontàrghe sàl e un poco de late pianìn pianìn. Impastàr tuto quanto con un bèl cuciàr de legno e missiàr co’ la zònta del cuciarìn de lievito. L’impasto el deve risultàr tenar, ma pronto quando dopo ogni sbatùda vegnarà fora le bognéte de aria.

Nel fratempo far boiar ‘na pignàta de aqua e sal. Te ciapi l’impasto preparà a tochétini e co’ un ciciàr te pol butàrli de corsa ne la pignàta. Quando te vedi nodàr i gnòchi, l’è ora de pescàrli fasèndoli sgossàr.

I gnòchi va consà co’ botiér, scaldà e desfà in compagnia de la puìna e se te vol zontàrghe anca del bon formàio Monte gratà no fa mai mail.

A mi me piase i gnòchi al sugo de pomodoro e formàio parmigian. 😉